Tahir İmanov merlə görüşdü: Vaxt lazımdır

Tahir İmanov merlə görüşdü: Vaxt lazımdır

Azərbaycanın xalq artisti, bəstəkar Süleyman Ələsgərovun ailəsi onun adına veriləcək bir neçə küçə ilə bağlı təklif irəli sürüb.

Bu barədə Report-a mərhum bəstəkarın nəvəsi, "Parni iz Baku" KVN teatrının bədii rəhbəri Tahir İmanov məlumat verib.

O bildirib ki, təklif edilən küçələr Bakının Nərimanov rayonu ərazisində yerləşir:

"Müvafiq dövlət qurumlarından müsbət rəy alınandan sonra küçəyə Süleyman Ələsgərovun adı veriləcək. Əslində, biz küçəni seçib müvafiq qurumlara müraciət etmişik. Amma həmin küçənin artıq ad daşıdığına görə imtina olunduğu deyilib. Bir də bunun üçün vaxt lazımdır. Çünki biz təkliflərimizi müvafiq qurumlara göndəririk və onlardan cavab gələnə qədər vaxt gedir. Ona görə də hələ ki, müzakirələr gedir. Bu müzakirələrdə S.Ələsgərovun ailə üzvləri şəxsən iştirak edir. Bu, bir gündə həyata keçirilən iş deyil. Yüz ölçüb, bir biçmək lazımdır”.

T.İmanov vurğulayıb ki, bununla bağlı Bakı Şəhər İcra Hakimiyyətinin (BŞİH) başçısı Eldar Əzizovla bir neçə dəfə görüşüb. "E.Əzizovla telefonla danışmadığım gün yoxdur. Bu barədə ikitərəfli danışıqlar və fikir mübadiləsi aparırıq”.

Qeyd edək ki, martın 1-də Prezident İlham Əliyev və birinci xanım Mehriban Əliyevanın mədəniyyət və incəsənət xadimləri ilə görüşü olub. Görüşdə mədəniyyət işçiləri xahişlərini bildirib və təkliflərini irəli sürüblər. T.İmanov ölkə başçısına babası S.Ələsgərovun adına küçə verilməsi barədə xahiş edib. Prezident Bakıdakı küçələrdən birinə Süleyman Ələsgərovun adının verilməsi üçün göstəriş verib.

Miq.Az



İSTİFADƏ QAYDALARI

Müəllif hüquqları qorunur.
Məlumatdan istifadə etdikdə istinad mütləqdir.
Məlumat internet səhifələrində istifadə edildikdə müvafiq keçidin qoyulması mütləqdir.

BİZİMLƏ ƏLAQƏ

Tel: +994 55 875 56 58
[email protected]

www.miq.az