Əsəd Rusiya ilə münasibətindən danışdı

Suriya prezidenti bu günlərdə prezident sarayında adları açıqlanmayan ərəb nümayəndələrini qəbul edib.

Suriya prezidenti Bəşər Əsəd bildirir ki, hakimiyyət qüvvələri öz fəaliyyətlərinin effektivliyini xeyli artırıb və təşəbbüsü öz əllərinə alıb. Onun sözlərinə görə, terrorçular isə bir neçə ağır məğlubiyyətə məruz qalıb.

“Əl-Əhbar” qəzetinin məlumatına görə, Suriya prezidenti bu günlərdə prezident sarayında adları açıqlanmayan ərəb nümayəndələrini qəbul edib. Görüş zamanı Bəşər Əsəd bildirib ki, terrorçu qüvvələrinə bir sıra ağır zərbələr endiriblər və tezliklə onların fəaliyyəti qələbə ilə nəticələnəcək.

Bəşər Əsəd qeyd edib ki, ABŞ hal-hazırda Suriya münaqişəsinə hərbi müdaxilə etmək əzmində deyil. Qeyd etmək lazımdır ki, Barak Obama yanvarın 28-də bildirib ki, Suriya ilə bağlı daha aktiv fəaliyyətə keçmək barədə düşünürlər.

Əsədin sözlərinə görə, Rusiya Suriyanı dəstəkləməkdə davam edəcək. Belə ki, onlar əslində Suriyanı deyil, özlərini müdafiə edirlər. Bu arada Rusiya baş naziri Dmitri Medvedev bu günlərdə CNN-ə müsahibəsində bildirib ki, Suriyada yaranmış vəziyyət diplomatik yolla həll edilməlidir.

Xəzərxəbər