Aktyorumuzun oynadığı film Kann festivalında

Vətəninfo.az  xəbər verir ki, Azərbaycan Dövlət Gənc Tamaşaçılar Teatrının istedadlı aktyoru Rasim Cəfərovun rol aldığı “Torn” qısametrajlı filmi Kann Kino Festivalının müsabiqədənkənar proqramında nümayiş olunacaqdır. Festivalın “Rejissor həftəliyi” proqramına daxil edilmiş filmin rejissorları Elmar İmanov və  Engin Kundağdır.
Iki dünya haqqında qısametrajlı filmdə bugünkü Bakının fonunda iki insanın – ata və oğulun həyatından bir epizod təqdim olunur...
Film  Azərbaycanın “Fil Production” və Almaniyanın  “Color of May” şirkətlərinin birgə əməkdaşlığı ilə ərsəyə gəlib. May ayının 14-dən-25-dək davam edəcək festivalda iştirak etmək üçün aktyorumuz bu günlərdə Fransaya yola düşəcəkdir.
Məlumat üçün bildirək ki, “Rejissor həftəliyi” Kann festivalının xüsusi paralel proqramıdır. 1968-ci ildəki çıxışlardan sonra yaranaraq bütün dünyanın müstəqil müəllifləri üçün platforma rolunu oynayır. Bir zamanlar burada Verner Hersoqun, Fassbinderin, Hanekenin, Cim Carmuşun, Skorsezenin, Koppolanın və başqa indi məşhur olan o zamankı gənc rejissorların debüt işləri təqdim olunmuşdur.

Vətəninfo.az