AŞPA seçki müşahidə missiyasının Azərbaycana səfəri başlayıb

Avropa Şurası Parlament Assambleyasının (AŞPA) seçki müşahidə missiyasının bu gün Azərbaycana ilk səfəri başlayıb.

Vətəninfo.az-ın APA-ya istinadən məlumatına görə, ispaniyalı parlamentar Yordi Çuklanın başçılığı ilə 5 nəfərlik AŞPA nümayəndə heyəti seçkiqabağı durumu öyrənmək üçün 2 gün Azərbaycanda olacaq. Səfərin məqsədi 1 noyabr tarixində Azərbaycanda keçiriləcək parlament seçkiləri ilə bağlı seçki sistemini və  seçki kampaniyasını dəyərləndirməkdir. Nümayəndə heyəti parlamentin spikeri, parlamentdə təmsil olunan parlament qrupları və partiya liderləri, həmçinin parlamentdə təmsil olunmayan müxalif partiya liderləri ilə görüşəcək. Bundan başqa, Azərbaycanın AŞPA-dakı nümayəndə heyəti, Mərkəzi Seçki Komissiyasının sədri və Qeyri-Hökumət Təşkilatları, media nümayəndələri ilə də görüş planlaşdırılır.

Nümayəndə heyəti seçki öncəsi səfərlə bağlı yazılı bəyanat hazırlayacaq.

Nümayəndə heyətinin tərkibinə həmçinin Almaniyadan Franck Schwabe, keçmiş Yuqolsaviya Respublikası və Makedoniyadan Aleksandar Nikoloski, Türkiyədən Egemen Bağış və İspaniyadan Aqustin Konde daxildir.