“Azərbaycan musiqi gecəsi” keçirilib

Oktyabrın 8-də və 9-da Fransanın Aşağı Normandiya regionunun Orn departamentinin Sees və Banyol şəhərlərində "Azərbaycan musiqi gecəsi” adlı konsert proqramı təşkil edilib.

Ölkəmizin Fransadakı səfirliyinin, Azərbaycanın Dostları Assosiasiyasının, Azərbaycan Evinin, Sees və Banyol şəhərləri meriyalarının dəstəyi ilə təşkil edilən konsert proqramının məqsədi Azərbaycan mədəniyyətini, incəsənətini Fransada təbliğ etmək olub.

Konsertdən əvvəl Azərbaycanın Fransadakı səfirliyinin nümayəndəsi Ayaz Qocayev Azərbaycan-Fransa münasibətləri, ölkəmizin qədim və zəngin mədəniyyəti, incəsənəti, musiqisi, Heydər Əliyev Fondunun Azərbaycan mədəniyyətinin dünyada təbliği üçün reallaşdırdığı layihələr haqqında məlumat verib. O, həmçinin Azərbaycanın Dostları Assosiasiyasının fəaliyyətindən və onun ölkəmizin mədəniyyətinin tanıdılması istiqamətində həyata keçirdiyi layihələrdən bəhs edib.

Konsert proqramı Azərbaycanın gənc caz ustası, pianoçu Etibar Əsədlinin ifası ilə başlayıb. O, Azərbaycan bəstəkarlarının əsərlərini ifa edib.

Sonra Bakı Xoreoqrafiya Məktəbinin "Bakı ulduzları” rəqs ansamblı Azərbaycan milli rəqslərini ifa edib. Konsert zamanı tamaşaçılara milli rəqslərimiz barədə geniş məlumat verilib.