Belə festivalla hər bir ölkə fəxr edə bilər

Qəbələ VII Beynəlxalq Musiqi Festivalı ansamblımızın üzvlərində çox dərin təəssüratlar yaratdı. Xüsusilə də tamaşaçıların konsertimizə münasibəti bizi ruhlandırdı.

Vətəninfo.az AZƏRTAC-a istinadla xəbər verir ki, bu sözləri Qəbələ VII Beynəlxalq Musiqi Festivalının iştirakçısı olan İspaniyanın "Barselona və Flamenko” ansamblının üzvü Luis el Qranaino deyib.

Azərbaycanda auditoriya qarşısında ilk dəfə çıxış etdiklərini bildirən L.Qranaino festivalın tamaşaçılarına və Qəbələnin gözəl təbiətinə heyran qaldığını vurğulayıb: "Ölkənizi çox sevdim. Qəbələ səhnəsindəki iki saatlıq konsertimizdən sonra tamaşaçıların ayaqüstə dayanmadan bizi alqışlaması məni təəccübləndirdi. Bizim ansamblın üzvləri tamaşaçılara hörmət əlaməti olaraq yenidən onlara iki flaminko rəqsi nümunəsi təqdim etdi. Biz Azərbaycandan xoş təəssüratlarla ayrılırıq”.

O, Qəbələ Beynəlxalq Musiqi Festivalının yüksək səviyyədə təşkil olunmasından da razı qaldığını bildirərək deyib: "Burada konsertlər möhtəşəm keçir. Belə festivalla hər bir ölkə fəxr edə bilər. Bəzi Avropa ölkələrində bu cür, yəni açıq havada festival hələ də yoxdur”.