Boksçumuz yarışa çıxmayacaq

Azərbaycan boks millisi ciddi itki ilə üzləşib.

Vətəninfo.az APA-ya istinadla bildirir ki, +91 kq çəki dərəcəsində yarımfinala yüksəlməklə, ən azı bürünc medalı özünə təmin edən Məhəmmədrəsul Məcidov Avropa Oyunlarında çıxışını başa vurub.
 Buna səbəb onun zədələnməsidi. Bu üzdən də ikiqat dünya və Avropa çempionu, Olimpiadanın bürünc mükafatçısı sabah rusiyalı Qasan Qimbatovla keçirilməli olan döyüşə çıxmayacaq. Sonuncu birbaşa finala yüksələcək.
 Komandamızın məşqçisi Nəriman Abdullayev bildirib ki, həkimlərin rəyinə əsasən Məhəmmədrəsulun zədəli rinqə çıxması təhlükəsiz deyil: “Məcidov çox ağır zədə alıb. Bu cür döyüşmək mümkün deyil. O, bu səbəbdən də çıxışını başa vurub”.
 Məcidovun 1/4 finalda türkiyəli Əli Dəmirəzənlə görüşdə başından zədələndiyi bildirilir.
 Qeyd edək ki, Bakı-2015-də 11 boksçumuz yarımfinalda iştirak hüququ qazanıb. Onlardan Məcidov bürünc medalla kifayətləndiyi halda, digərləri 1/2 final döyüşlərində mükafatın əyarını yüksəltməyə çalışacaqlar.