Ermənistanın iqtisadi rəqabətin müdafiəsi üzrə Dövlət Komissiyası Rusiya Dəmir Yollarının törəmə şirkəti olan "Cənubi Qafqaz Dəmir Yolu" QSC-ni (CQDY) tarifləri əsassız yerə qaldırmaqda şübhəli bilib və müvafiq materialları Rusiya Federal Anti-İnhisar Xidmətinə təqdim edib.

Bunu çərşənbə axşamı Ermənistan parlamentində komissiya sədri Artak Şaboyan bildirib. /"Report"/

"CQDY dəmir yolu üzrə yük daşımaları tariflərini qaldırıb. Bunu şirkətin Ermənistanın vaqon parkları operatorları arasında tutduğu üstün vəziyyətindən sui-istifadə etməsi kimi hesab etmək olar. CQDY tariflərin qaldırılmasını 9 milyard dram (18 milyon ABŞ dolları) ziyanda olması ilə əsaslandırıb", — deyə Şaboyan qeyd edib.