Goranboyda sakinlər donur - Şikayət

Goranboy rayonu Qaz İstismar Sahəsi təyinatı üzrə fəaliyyət göstərmir.

Bu barədə Tatarlı kənd sakini Ceyhunə Məhərrəmova VİZUAL.az-a məlumat verib. Kənd sakini bildirib ki, borc yarandığı üçün evinə verilən qazı kəsiblər.

Qaz idarəsinin işçiləri borcun müəyyən bir hissəsini ödədikdən sonra onun evinə qazın veriləcəyini deyiblər. C.Məhərrəmova borcunun bir hissəsini ödəməsinə baxmayaraq, hələ də qazın verilişi bərpa edilməyib.

Kənd sakini dəfələrlə Qaz İstismar Sahəsinə getsə də, xeyri olmayıb. 3 azyaşlı uşaqla evlərini isitməyə heç bir şey olmadığından narazılıq edən C.Məhərrəmova QİS-dən narazı qalan yeganə sakin deyil.

Digər kənd və qəsəbələrdə də abonentləri aldadan sahə işçiləri zorla pul tələb etməkdən belə çəkinmir. Qurum paytaxt və regionlarda qaz idarə işçilərinə ödəniş etməyi qadağan etsə də, sözügedən kənddə ödəmə terminalları qurulmayıb. Bu səbəbdən kənd sakinlərinin ödənişi yerli sahə işçilərinə ödəməkdən başqa çarəsi qalmır.