Kulinarlarımız iki qızıl, bir gümüş və üç bürünc medal qazanıblar

Aprelin 28-də “Trend” Xəbərlər Şirkətinin mətbuat mərkəzində Milli Kulinariya Assosasiyasının prezidenti Tahir Əmiraslanovun rəhbərliyi ilə qurumun Bosniya-Hersoqovinanın Sarayevo şəhərində və Çernoqoriyanın Budva şəhərində keçirilən beynəlxalq kulinariya çempionatındakı iştirakının nəticələrinə dair mətbuat konfransı keçirilib.

Vətəninfo.az AZƏRTAC-a istinadən xəbər verir ki, T.Əmiraslanov komandamızın bu yarışlardan 2 qızıl, 1 gümüş 3 bürünc medal, 6 fəxri diplom qazandığını bildirib.

Vurğulanıb ki, komandamızın bu yarışlardakı qələbəsinə “Azərsun Holdinq” Şirkətlər Qrupunun istehsalı olan “Super sun” və “Zeytun” yağlarının müsbət təsiri olub.

Konfrans çərçivəsində gənc kulinarlarımızın iştirakı ilə Bosniyanın milli yeməyi sayılan “Bəy şorbası” (Boşnaq) hazırlanıb. Bosniyalıların Ginnesin rekordlar kitabına düşmək üçün hazırladıqları 14 min nəfərlik şorbanın ərsəyə gəlməsində 100 aşpaz iştirak edib. Şorba üçün 1 ton toyuq əti, 300 kq digər məhsullar istifadə edilib. Şorba 1 metr dərinliyi 5 metr diametri olan qazanda hazırlanıb.

Məlumat verilib ki, komandamız 8 ölkənin iştirak etdiyi Budva şəhərində keçirilən Beynəlxalq Kulinariya Çempionatında da uğurlu çıxış edib. Azərbaycan bu yarışmada münsiflər heyətində təmsil olunub.