Mikayıl Cabbarov Kürdə batan qəhrəman müəllimin evində

Sabirabad rayonundakı 5 saylı orta məktəbin əmək təlimi müəllimi, ötən il dekabr ayının 5-də Kür çayına düşmüş maşından 3-cü sinif şagirdi Güldəstəni xilas edərək özü sularda qərq olmuş 57 yaşlı Əhliman Hüseynovun ruhunun ən çox sevindiyi gündür bu gün... İllər ötəcək, bu məktəbdə çalınan hər “Son zəng”in səsinə əsl müəllimin qəhrəmanlıq hekayəsini yazmış Əhliman müəllimin ruhu da səs verəcək.
Bu gün təhsil naziri Mikayıl Cabbarov Əhliman Hüseynovun xatirəsinə hörmət əlaməti olaraq onun işlədiyi Sabirabad şəhər 5 saylı orta məktəbdə oldu.
Nazir tədbirdəki çıxışında Əhliman Hüseynovu müəllimlik missiyasının ləyaqətli daşıyıcısı adlandırdı.
Təhsil naziri Sabirabad RİH başçısı Nazim İsmayılovla birgə məktəbdə keçirilən tədbirdə iştirak etdikdən sonra Əhliman müəllimin Cavad kəndindəki evinə də baş çəkib ailə üzvləri ilə görüşdü.
Nazir və onu müşayiət edən şəxslər Cavad kəndinə gedən yolda isə Kür çayı üzərindəki körpüdə, faciənin baş verdiyi yerdə dayanaraq Əhliman müəllimin xatirəsini bir daha yad etdilər.
Qeyd edək ki, Əhliman müəllimin mənzil şəraiti nəzərə alınaraq Təhsil Nazirliyinin himayəsi ilə mərhumun həyətində yeni ev də tikilib. Nazir yeni evdə aparılan son tamamlama işləri ilə də tanış oldu.

Virtualaz.org