“Türklərə qarşı haqsızlıq edirlər”

Avropa Liqasında "Braqa”ya 1:4 hesabı ilə uduzan "Fənərbaxça”nın dünən portuqallara qarşı oyununun baş hakimi İvan Bebekin idarəçiliyi türkiyəliləri özündən çıxarıb.

Miq.az xəbər verir ki, "NTV Spor” şərhçisi Rıdvan Dilmən də serbiyalı referinin qərarlarına etirazını bildirib.

Dilmən Bebekin qərarların belə şərh edib: "Mən oyun izlərkən heç telefonumu yanımda saxlamıram. Axşam oyuna baxarkən qızım Əda mesaj yazdı. Yazırdı ki, "ata bu hakimin etdikləri biabırçılıqdır. Yəqin ki, referi dəli olub”. "Fənər”in oyunu başlayanda Fatih Terim mənə telefonda dedi ki, "bitdi, "Fənər” üçün Avroliqa bitdi”. Hakimin türklərə qarşı etdiklərini saydı. İslandiya ilə oyunda Ömərə qarşı haqsızlıq etdi. Çempionlar Liqasında "Qalatasaray”ın kapitanı Selçuk İnanı oyundan qovdu. Bu hakim bizə qarşı həmişə pis olub”.

Rıdvan bu matçın əvvəlcədən hazırlandığını bildirib: ""Fənərbaxça”ya qarşı əməliyyat etdilər. Bu oyun üçün 2-3 həftə öncədən hazırlaşmışdılar. "Qalatasaray”a cəza verdilər, amma "Bayer” bu cəzadan qurtula bildi. Oyun alqı-satqısına görə bir çox komandalara güzəştə getdikləri halda türklərə qarşı bunu etmədilər. Dünənki matç hər şeyi ortaya çıxardı. Mən karyeramda bundan böyük əməliyyat görməmişəm”.

Miq.az