Suriyanın Türkiyə ilə sərhəddə - Türkməndağı bölgəsində müxalif qruplaşmalar rus və suriyalı hərbçilərin toplantısına qəfil hücum edərək, 8-i general olmaqla, 15 hərbçini öldürüb.

Anadolu Ajansı-na istinadən verilən xəbərdə deyilir ki, bölgədəki əməliyyatları müzakirə etmək üçün Duveyrik və Səlma qəsəbələri arasında toplantı keçirən rus və suriyalı hərbçilər bir anda müxaliflərin hücumuna məruz qalıb.

Nəticədə 4-ü rus, 4-ü isə suriyalı general olmaqla, 15 hərbçi öldürülüb.

Öldürülən rus hərbçilərdən birinin Suriyadakı əməliyyatları koordinasiya edən Yuri adlı general-leytenant olduğu iddia edilib. Digər 3 rus hərbçi isə general-mayor olub.

Öldürülən suriyalı generallar isə general-mayor Amid Munzur, general-mayor Əli Cabir, general-mayor Əli Umran və general-mayor, adının əvvəli Adnan olduğu şəxsdir.