“Bahalı polis maşınları yox, qartəmizləyən texnika almaq lazımdır” - Elmira Axundova

Milli Məclisin bugünkü iclasında deputatlar qar yağan zaman ölkədə elektrik enerjisi ilə bağlı yaranan problemlərə də toxunublar.

Deputat Elmira Axundova deyib ki, Azərbaycan bölgələri ekstremal hava şəraitinə uyğun deyil: “Salyan, Lənkəran, Cəlilabad və Masallıda elektrik təchizatı ilə bağlı ciddi problemlər yaranıb. Hazırda yenilənmə işləri görülür. Ancaq bu işlər ləng aparılır. Güman edirəm ki, “Azərişıq”ın sədri bu məsələləri nəzərə alacaq və qısa zamanda yaranmış problemləri həll edəcək”.

Deputat onu da deyib ki, qarlı havalar göstərdi ki, rayonların kommunal təsərrüfatı yüksək səviyyədə deyil: “Kəndlərarası, rayonlararası yollarda qar təmizləyən texnikalar yoxdur. Bu səbəbdən bir çox yol nəqliyyat hadisələri baş verir. Bahalı polis maşınları almaqdansa, bu cür texnikalar almaq daha məqsədə uyğundur”.

Vətəninfo.az