Bakıda minik maşını evi dağıtdı

Qəza zamanı sakinlərin evdə olmaması baş verə biləcək faciənin qarşısını alıb.

“Vətəninfo.az” xəbər verir ki, ötən gecə Bakının Nəsimi rayonu Əbdülvahab Salamzadə küçəsində yol nəqliyyat hadisəsi baş verib. Qəza zamanı Məhəmməd Ağamalıyev idarə etdiyi “Mitsubishi” markalı avtomaşını əvvəlcə yaxınlıqda tikintisi gedən yol ötürücüsünə vurub.

Bundan sonra isə nəqliyyat vasitəsinin sahibi avtomaşını Valeh Tağıyevə məxsus 3-otaqlı evə çırpıb. Sürücü Məhəmməd Ağamalıyev ilk qəzadan sonra özünü itirərək əyləc yerinə qaza basdığını deyib.

Qəzadan sonra mənzilin iki otağında tavan aşıb və ev tamamilə yararsız vəziyyətə düşüb. Qəza zamanı ev sakinlərinin evdə olmaması isə baş verə biləcək faciənin qarşısını alıb.

Faktla bağlı Nəsimi Rayon Polis İdarəsinin əməkdaşları tərəfindən araşdırma aparılır. Yol nəqliyyat hadisəsinin baş vermə səbəbləri və ev sahibinə dəyən ziyanın məbləği araşdırmaların sonunda bəlli olacaq.

Anspress