Beynəlxalq Bakı Konfransı ilk seminarını keçirdi

Bu gün Azərbaycan Turizm İnstitutunda Mədəni mülkiyyətin mühafizəsi və bərpasının öyrənilməsi üzrə Beynəlxalq Mərkəzin sabiq baş direktoru, İtaliyanın Romualdo del Bianko fondunun xarici əlaqələr üzrə əlaqələndiricisi cənab Mark Leananın moderatorluğu ilə turizm və irs sahələri üzrə ixtisaslaşan tələbələr və mütəxəssislər üçün "Mədəni irs davamlı sosial inkişafın əsası” mövzusunda seminar keçirilib.

“Vətəninfo.az” xəbər verir ki, tədbir "Təzyiq altında irs – şəhərlərin tarixi landşaftlarının perspektivləri” adlı Beynəlxalq Bakı Konfransı çərçivəsində baş tutub.

Tədbirdə müzakirə edilən əsas mövzu, mədəni turizmin və irsin davamlı sosial inkişafın dinamikasına təsirləri ilə bağlı olub.Həmçinin, tədbirdə bu sahə üzrə dünyada ən parlaq nümunələr barədə məlumat verilib, irsin innovativ metodlarla idarə edilməsi və inkişaf etdirilməsi ilə bağlı nümunələr təhlil edilib.

Qeyd edək ki, "Təzyiq altında irs – şəhərlərin tarixi landşaftlarının perspektivləri” adlı Beynəlxalq Bakı Konfransı Azərbaycan Respublikasının Mədəniyyət və Turizm Nazirliyinin YUNESKO-nun Ümumdünya İrs Mərkəzinin məşvərətçi orqanları olan İCCROM və İCOMOS təşkilatları, eləcə də Azərbaycan Memarlıq və İnşaat Universiteti və İtaliyanın Romualdo del Bianko fondunun birgə tərəfdaşlığı ilə keçirilir.

Konfransın təntənəli açılış mərasimi isə aprelin 27-də baş tutacaq.

Mirvari Nəcəf