Binəqədidə ev yandı

Binəqədidə iki otaqlı evdə yanğın olub.

Vətəninfo.az APA TV-ə istinadən xəbər verir ki, ev sahibi və onun həyat yoldaşı mənzildəki əşyaları çıxaran zaman boğulmaq təhlükəsi ilə üzləşiblər.

Qonşular tərəfindən zərərçəkmişlərə ilkin tibbi yardım göstərilib. Hadisə paytaxtın Binəqədi rayonu Rəsulzadə qəsəbəsi döngə 1, mənzil 71 ünvanında yaşayan Rizvan Rasimova məxsus birmərtəbəli evdə qeydə alınıb.

Evin damının alışdığını görən ev sahibi dərhal hadisə haqqında Fövqəladə Hallar Nazirliyinin “112” xidmətinə məlumat verib. Hadisə yerinə nazirliyin Dövlət yanğından Mühafizə İdarəsinin Binəqədi Rayon Hissəsinin texnikası və canlı qüvvəsi cəlb olunub.

Yanğın zamanı xəsarət alan olmasa da ümumi sahəsi təqribən 74 kv.m olan 2 otaqlı evin tavan hissəsi və mənzildə olan soyuducu yanıb. Yanğın qısa zaman ərzində söndürülüb, alovun ətrafdakı tikililərə keçməsinin qarşısı alınıb. İlkin ehtimala görə, hadisə elektrik naqillərində yaranan qısa qapanmadan baş verib. Faktla bağlı araşdırma aparılır.

Vətəninfo.az