Deputat turizm sektorundakı problemlərdən danışdı

«Dünyanın bir sıra ölkələrində gəlirlərin 70 faizini turizm sektorundan daxilolmalar təşkil edir». Bunu deputat Elmira Axundova Milli Məclisin iclasında büdcə müzakirələri zamanı çıxışanda deyib. Onun fikrincə, Azərbaycanda turizm sektorunda qiymətlər yüksəkdir. Yüksək qiymət müqabilində təklif edilən xidmətlər isə adekvat deyil: «Xidmətlər rəngarəng deyil, eləcə də alternativ turizm xidməti yoxdur. Reklam işi düzgün təşkil edilməyib. Bu sahəyə diqqəti artırıb turist cəlb edə, gəlir götürə bilərik».

Deputat  2016-cı ildə büdcədən Səhiyyə Nazirliyinə ayrılan vəsaitin azaldılmasına da narazılıq edib. Elmira Axundova digər mənbələrin azaldılması ilə səhiyyə xərclərinin saxlanması təklifini irəli sürüb. O həm də qeyd edib ki, kiçik sahibkarlıq inkişaf etdirilməlidir və banklar onlara kredit ayırmalıdır: «Kiçik sahibkarlığın inkişafı ilə regionlarda iş yerləri açılmalıdır ki, gənclərimiz işlə təmin edilsin və əhalinin ələ baxımlılığına son qoyulsun. Necə deyərlər, onlara balıq vermək əvəzinə,  balıq tutmağı öyrətmək lazımdır».