Erməni əsgər hərbi hissədə qumbara partlatdı: 1 ölü

İşğal edilmiş Dağlıq Qarabağda həlak olmuş erməni əsgərin ölüm səbəbi məlum olub.

ANS PRESS-in məlumatına görə, 19 yaşlı əsgər David Koloyan qumbara partlayışı nəticəsində ölüb. Hadisə 21 dekabr tarixində baş verib.

1995-ci il təvəllüdlü David Koloyan cəbhə xəttinin Ağdam hissəsində yerləşən hərbi hissələrdən birində ölüb.

Qeyd edək ki, Ermənistan müdafiə naziri Seyran Ohanyan ötən gün çıxışında 2014-cü ilin Ermənistan ordusu üçün ağır il olduğunu bəyan etmişdi.

Ohanyan jurnalistlərə açıqlamasında bildirib ki, bu ilin ilk faciəsi Ermənistan silahlı qüvvələrinin giziri Armen Ovanisyanın Qarabağda döyüşlər zamanı ölməsi olub.

"Ordumuz üçün ən gərgin vaxt isə iyul-avqust aylarında təmas xəttində şiddətli döyüşlərin getməsi oldu. Bu ilin ən pik nöqtəsi isə Mi-24 helikopterinin Azərbaycan Silahlı Qüvvələri tərəfindən vurulmasıdır. Həmin an 3 pilotumuz həlak oldu", deyə Ohanyan bildirib.