1. Miq.az
  2. Məryəm Əliyeva- Yeni şeirlər

Məryəm Əliyeva- Yeni şeirlər

Məryəm Əliyeva- Yeni şeirlər
Tarix: 24.03.2019 22:48
Baxış sayı: 3779


Mən elə bir Günəşəm,
Odum səni yandırır.
Uçur qığılcımları-
Ağ kəfəni yandırır.

İllərinin  kəməndi,
Düyünləri əmindi.
Elə bilmə qəm indi,
Bircə məni yandırır.

Gördüyün dərd dəstəsi,
Bir buludun bəstəsi.
Damcıların istisi,
Çökür, çəni yandırır.


***
Gözüm üstə olanlarım,
Gözümdə əsdi bilmədim!
Bağlamadı kipriyimi,
Nə idi qəsdi ,bilmədim!

Bir ümiddən fərəhlənən,
Sevdasıyla yəhərlənən.
Bilə-bilə qəhərlənən,
Yaşımı kəsdi, bilmədim!

Önü bağlı arzularım,
Yarı,bütöv duyğularım.
Quş qanadlı xəyallarım,
Bəxtimə küsdü, bilmədim!

Duman çökdü tellərimə,
Külüng çaldı illərimə,
Danışmadı dil yerimə,
Sədaydı,səsdi,bilmədim!

Kiçik, böyük qırışlarım,
Ağ-qaralı naxışlarım.
Ölüm-qalım yarışlarım,
Söylədi, bəsdi, bilmədim!


***

Saçlarımın qoxusunu köksünə,
Çəkə-çəkə çağlayasan, daşasan.
Bircə-bircə yığa bilsən dənlərin,
Ürəyinlə bağlayasan, yaşasam.

Köklənəsən birdəfəlik ömrümə,
Qoymayasan illərimi laxlaya.
Budaqlarım silkələsə bəxtimi,
Qismətinə  "güllərimi” saxlaya.

Qatar-qatar arzularım yol gedə,
Körpü ola ürəyimə gözlərin.
Yüz ümiddən bircəsinin dalıyca,
Çata bilə köməyinə sözlərin.

İnsaf edə dil vüsalın cəhdinə,
Çəkə bilə kəlmə-kəlmə qəhərin.
Bəlkə onda danışmaya hicranım,
İçə bilə qurtum-qurtum zəhərin.

Mənim gözüm həyat adlı bir kitab,
Ürəklənib oxuyasan halımı.
Kipriyinlə hana qurub gözümdə,
Baxışınla toxuyasan xalısın.

Məryəm Əliyeva

Miq.Az


Həmçinin oxuyun

İSTİFADƏ QAYDALARI

Müəllif hüquqları qorunur.
Məlumatdan istifadə etdikdə istinad mütləqdir.
Məlumat internet səhifələrində istifadə edildikdə müvafiq keçidin qoyulması mütləqdir.
BİZİMLƏ ƏLAQƏ

Tel: +994 55 875 56 58
infomiqaz@gmail.com

www.miq.az