Putinə səfər hədiyyəsi – aeroport

“Ermənistanda rusiyalaşdırma elə yüksək tempdə gedir ki, sonda bunun nə ilə nətcələnəcəyini təsəvvür etmək belə çətindir”.

Virtualaz.org bildirir ki, bunu “Aykakan Jamanak” qəzeti yazıb.

Yazıda daha sonra deyilir: “Mövcud hakimiyyət çoxdandır Gümrünün böyük bir hissəsini Rusiyanın 102-ci bazasının poliqonuna çevirib, indi isə deyəsən, növbə paytaxt İrəvana çatıb. Belə ki, hökumətin bu günə planlaşdırılan iclasının gündəliyinə “Erebuni” aeroportunun Rusiya hərbi bazasına verilməsi barədə məsələ salınıb”. Məqalədə o da bildirilir ki, düzdür, adıçəkilən aeroportdan hazırda da elə Rusiya Hərbi-Hava Qüvvələri istifadə edir. Amma təklif olunan qərarla aeroport artıq rəsmi şəkildə Rusiya hərbi bazasının mülkiyyətinə keçəcək: “Görünür, bu, bizim hökumətin dekabrın 2-də Ermənistana rəsmi səfərə gələcək Rusiya prezidenti Vladimir Putinə hədiyyəsidir”.

Məqalənin sonunda isə ironiya ilə deyilir: “Dekabrın 2-nə hələ var. Və bilmək olmaz ki, Ermənistan Rusiyaya daha neçə kilometr ərazisini peşkəş edəcək”.