Aygün Vəkilovanın xatirəsi yad edilib

Səməd Vurğunun ev-muzeyində böyük şairin nəvəsi, ev-muzeyinin direktoru Aygün Vəkilovanın xatirəsinə həsr edilmiş tədbir keçirilib.

Vətəninfo.az AZƏRTAC-a istinadən xəbər verir ki, tədbirə mərhumun oğlu, Bülbül adına Orta İxtisas Musiqi Məktəbinin 11-ci sinif şagirdi Vurğun Vəkilovun ifasında səsləndirilən musiqi sədaları altında Aygün xanımın həyat və fəaliyyətini əks etdirən videoçarxın nümayişi ilə başlanılıb.
Ev-muzeyinin əməkdaşı Xanım Şadlinski təəssüf hissi ilə, Aygün Vəkilovanın həyatdan vaxtsız köçdüyünü, muzeylə bağlı bir çox ideyalarının yarımçıq qaldığını söyləyib.
Mədəniyyət və Turizm Nazirliyinin sektor müdiri Azadə Hüseynova, Qazax Xeyriyyə Cəmiyyətinin sədri Vidadi Bayramov, Bakı Musiqi Akademiyasının professoru, əməkdar incəsənət xadimi Zümrüd Dadaşzadə, sənətşünaslıq doktoru Ülviyyə Hacıbəyova və başqaları A.Vəkilovanın təmsil etdiyi ocağa layiqli övlad kimi sədaqətindən, gözəl dost olaraq insani keyfiyyətlərindən və layiqli mədəniyyət işçisi kimi fəaliyyətindən söhbət açıblar. Onun yüksək vətənpərvərliyindən, hər kəsə qayğı ilə yanaşmasından, elm, mədəniyyət, ədəbiyyat xadimlərinə xüsusi diqqətindən danışılıb.

Mərasimdə “Səməd Vurğun” mükafatının builki laureatlarına diplomlar təqdim olunub.

Sonda ailə adından Dürdanə Vəkilova tədbirin təşkilatçılarına və iştirakçılarına minnətdarlığını bildirib.