“Neftçi” – “Zestafoni” oyunu harada yayımlanacaq?

Bildiyiniz kimi, “Neftçi” bu gün Çempionlar Liqasının cavab matçında Gürcüstanda “Zestafoni” ilə üz-üzə gələcək. Bakı vaxtı ilə saat 22:00-da başlanacaq oyun David Abaşidze adına stadionda oynanılacaq.

Qarşılaşmanın hələ də canlı yayımlanıb-yayımlanmayacağı məlum deyil. Belə ki, “Zestafoni” matçı canlı vermək istəyən telekanaldan 100 min dollar tələb edir. “İdman Azərbaycan” isə bunu ödəmək barədə belə fikirləşmir. “Neftçi” isə onlara yardım etmək niyyətində deyil. Yəni son durum odur ki, “Neftçi”nin cavab oyunu televiziya ekranlarında olmayacaq.

Bunun üçün alternativ yollar axtarılır. Ola bilsin ki, Zestafoni ilə cavab oyunu AFFA-nın rəsmi saytının video bölməsində yayımlansın. Amma bu da bir ehtimaldır. Eyni zamanda vurğulayaq ki, oyun Gürcüstanın “İctimai” televiziyası vasitəsi ilə də yayımlanacaq.

Futbol11.az