Olimpiyaçılarımıza nikah qadağası!

“Vətəninfo”nun  “İTAR-TASS”a istinadən verdiyi məlumata görə, müvafiq viza məhdudiyyətini Böyük Britaniyanın Xarici İşlər Nazirliyi tətbiq edib. 2012-ci il London Yay Olimpiya Oyunlarında iştirak edən əcnəbi idmançı, məşqçi və rəsmi şəxslərə Böyük Britaniyada olduqları müddətdə nikaha girmək qadağan olunacaq.

Bu qərar qeyd olunan şəxslərin olimpiadadan Birləşmiş Krallıqda qalma hüququ əldə etməyə cəhd üçün yararlana biləcəyi təhlükəsi ilə əlaqədar verilib. Avropa Birliyi ölkələri istisna olmaqla, Londonda əcnəbi iştirakçılara 6 ay qüvvədə olma müddəti ilə ümumilikdə 20 min viza veriləcək. 

Sənəddə nikaha girməyi qadağan edən qrafa da olacaq. Həmçinin, viza alanlar Böyük Britaniyada təhsil üçün sənəd verə bilməyəcəklər. Artıq Böyük Britaniyanın Sərhəd Xidməti Beynəlxalq Olimpiya Komitəsinin üzvü olan 204 Milli Olimpiya Komitəsini bu barədə məlumatlandırıb.