“Özümü ulduz hesab etmirəm"

“Eurovision 2015” təmsilçimiz Elnur Hüseynov ötən gün Vyanada yarışma ilə bağlı keçirilən mətbuat konfransına qatılıb.

Vətəninfo.az Axşam.az-a istinadən xəbər verir ki, ifaçı yarışma, “O səs Türkiyə” ilə bağlı sualları cavablandırıb:
“Özümü ulduz hesab etmirəm. Dostlarımdan, insanlardan fərqlənmirəm. İnsanlar eyni səviyyədədir. Mən sadə insanam. Hazırda səhnə performansım üzərində çalışıram. Hər çıxışımda mahnını əhvalıma uyğun oxuyuram. Amma çalışacam yarıfinalda orijinal versiyasını təqdim edim. Hazırda çalışdığım heyət çox peşəkardır. “O səs Türkiyə”yə gedəndə inanmırdım ki, qalib olacam. Addım-addım irəlilədim. Hər verilişdə tamaşaçının marağının artdığını gördüm. Sevindim ki, müəllimim Ebru Gündəşin ümidlərini doğrultdum. Bizdə hər şey gözəl alındı”.
Tədbir zamanı E.Hüseynov Azərbaycan mahnısı oxuyub. Onun bu addımı alqışlarla qarşılanıb.
Qeyd edək ki, “Eurovision-2015” yubiley müsabiqəsi mayın 19-dan 23-dək keçiriləcək. Təmsilçimiz “Hour of the Wolf” mahnısını oxuyacaq.