20 Yanvar qırğınından 23 il ötür

Amma qatillər bu soyqırıma görə cavab verməyiblər

Bu gün keçmiş SSRİ hərbi birləşmələrinin 1990-cı il yanvarın 19-dan 20-nə keçən gecə Bakıda törətdikləri qətliamın 23-cü ildönümüdür. Hər il olduğu kimi bu ildə həmin qanlı hadisə Azərbaycanda ümummilli hüzn kimi qeyd edilir.
Bununla əlaqədar hökumət və dövlət nümayəndələri, siyasi partiyalar, ölkə ictimaiyyəti, Bakıdakı diplomatik korpusun təmsilçiləri, sıravi vətəndaşlar 20 Yanvar faciəsinin qurbanlarının dəfn olunduğu Şəhidlər Xiyabanını ziyarət edəcəklər. Ziyarətçilər 20 saylı orta məktəbin qarşısından başlayıb Parlament prospekti boyunca Şəhidlər Xiyabanına doğru hərəkət edəcəklər.
Yanvarın 20-də Bakı Polis Qarnizonu gücləndirilmiş rejimdə işləyəcək. 20 Yanvar faciəsinin 23-cü ildönümü ilə əlaqədar Daxili İşlər Nazirliyində hazırlanmış tədbirlər planına əsasən, yanvarın 20-si səhər saat 8-dən axşam saat 18-dək Parlament prospekti və Mehdi Hüseyn küçəsində nəqliyyatın hərəkəti tam məhdudlaşdırılacaq.
Dünya ictimaiyyətinin diqqətini Qanlı Yanvar faciəsinə yönəltmək üçün Azərbaycanın xarici ölkələrdəki səfirlikləri, diplomatik nümayəndəlikləri, Azərbaycan icmaları tərəfindən də müvafiq tədbirlər həyata keçirilir.
Yanvarın 20-də Bakı vaxtı ilə saat 12.00-da ölkə ərazisində şəhidlərin xatirəsi bir dəqiqəlik sükutla yad ediləcək, gəmilər, avtomobillər və qatarlar səs siqnalları verəcək. Həmin gün ölkə ərazisində matəm əlaməti olaraq Azərbaycanın dövlət bayraqları endiriləcək.

Azadlıq.info