AŞPA-nın payız sessiyası işə başlayıb

Sentyabrın 28-də Avropa Şurası Parlament Assambleyasının (AŞPA) payız sessiyası öz işinə başlayıb.

Sessiyada Assambleya Bürosunun və daimi komitənin görülən işlər barədə hesabatı dinləniləcək, Avropada miqrasiya böhranına siyasi və humanitar reaksiyalar, tranzit ölkələrdə çətinliklər, ictimai sağlamlığın və xəstələrin qorunmasına əczaçılıq sənayesinin təsiri, ATƏT-in fəaliyyəti və digər mövzularda fikir mübadiləsi aparılacaq. Həmçinin Avropada miqrantlara sığınacaq verilməsi ilə bağlı Nizamnaməyə yenidən baxılacaq.

Lüksemburqun Böyük Hersoqu Anri, Serbiyanın Baş naziri Aleksandr Vuçiç, Bosniya və Herseqovina Nazirlər Şurasının sədri Denis Zvizdiç sessiyada çıxış edəcəklər.

Avropa Şurasının baş katibi Torbyorn Yaqland parlamentarilərin suallarını cavablandıracaq.

Milli Məclisin beynəlxalq münasibətlər və parlamentlərarası əlaqələr komitəsinin sədri, AŞPA-dakı daimi nümayəndə heyətinin rəhbəri Səməd Seyidov və bir qrup deputat payız sessiyasında iştirak edir.

Sessiyada deputat Rafael Hüseynovun "Dini azadlıq və demokratik cəmiyyətdə birgə yaşama” mövzusunda məruzəsi dinləniləcək, mövzu ətrafında müzakirələr aparılacaq.

AZƏRTAC