“Bizim müxalifətlə ciddi fikir ayrılığımız var”

“Bizim birmənalı  mövqeyimiz bundan ibarətdir ki, Azərbaycanda “ siyasi məhbus ”lar yoxdur”. "Vətəninfo.az"ın məlumatına görə, bunu mətbuata açıqlamasında millət vəkili, Yeni Azərbaycan Partiyasının (YAP) icra katibi və sədr müavini  Əli Əhmədov dilə gətirib.

Onun dediyinə görə, hakim partiya olan YAP-ın, o cümlədən,  mövcud iqidarın da bu məsələ ilə bağlı mövqeyi hər kəsə çoxdan  bəllidir.

Ə.Əhmədov eyni zamanda onu da  qeyd edib ki, bu yöndə müxtəlif interpretasiyalar mövcuddur, yəni, Azərbaycan müxalifətinin bəzi nümayəndələrinin interpretasiyası bütövlükdə “siyasi məhbus” anlayışını ehtiva edən kriteriyalar çərçivəsindən kənara çıxdığından, bu barədə hakim partiya üzvlərinin müxalif kəsimlə ciddi fikir ayrılıqları var:

“Bu məsələ barəsində bizim müxalifətlə ciddi fikir ayrılığımız mövcuddur. Ona görə də onların “ siyasi məhbus ” adlandırdığı adamları biz siyasi məhbus saymırıq. Ona görə yox ki, biz bunu saymaq istəmirik, ona görə ki, bu insanlar hər hansı siyasi əqidəsinə, bütövlükdə əqidəsinə görə həbs olunmayıblar. 

Onların,  əməllərində cinayət tərkibi olduğuna görə həbs olunan insanları “siyasi məhbus” kateqoriyasına aid etməsini isə biz  ümumiyyətlə, hüquqa hörmətsizlik hesab edirik”-deyə,Ə.Əhmədov sonda  sözlərinə əlavə edib.

Kənan