BMT Suriyaya humanitar yardım çatdırılması səlahiyyətini uzatdı

BMT Təhlükəsizlik Şurası (TŞ) növbəti 12 ayda Dəməşqin ilkin razılığını almadan Suriyaya birbaşa humanitar yardım çatdırılması səlahiyyətini uzadan qətnamə qəbul edib.

 Səsvermə zamanı sənədi TŞ-nin bütün 15 üzvü dəstəkləyib.

Vətəninfo.az xəbər verir ki, qəbul edilmiş sənəd ölkədaxili münaqişə tərəflərindən, xüsusən də Suriya hökumətindən beynəlxalq humanitar hüquq öhdəliklərinin yerinə yetirilməsini, insan haqlarını və Təhlükəsizlik Şurasının 2139 və 2165-ci qətnamələrini yubanmadan təmin olunmasını tələb edir.

Hazırda 12,2 milyon suriyalının təcili köməyə ehtiyacı olduğunu bildirən BMT Baş katibinin humanitar məsələlər üzrə müavini Valeri Amos vətəndaş müharibəsi səbəbindən ölkə əhalisinin təxminən yarısının evlərini tərk etməyə məcbur olduğunu da qeyd edib.

Təşkilatın son məlumatına görə, Suriya münaqişəsində ölənlərin sayı il ərzində iki dəfə artaraq 200 minə yaxınlaşıb, 1 milyondan çox insan isə yaralanıb.