Bakı Ağır Cinayətlər Məhkəməsində Xaçmaz rayon sakini Tehran Quliyevin CM-nin 120.1-ci (qəsdən adam öldürmə) maddəsi ilə təqsirləndirilməsinə dair cinayət işi üzrə hazırlıq iclası keçirilib.

Miq.az-ın məlumatına görə, bu il avqustun 4-də Xaçmaz rayonunun Gödəkli kəndində Cəfər Hacıyevin (1972-ci il təv.) üzərində zorakılıq əlamətləri (döyülmə xarakterli) ilə olan meyiti aşkar edilib. Hadisədən 5 gün sonra DİN Baş Cinayət Axtarışı İdarəsi və Xaçmaz RPŞ əməkdaşlarının əməliyyat-axtarış tədbirləri nəticəsində şübhəli şəxs qismində rayon sakini Tehran Quliyev saxlanılıb.

Araşdırma zamanı məlum olub ki, Cəfər Hacıyevlə Tehran Quliyev həmkəndli olublar. Hadisə şəxsi münasibətlərin pozulması zəminində baş verib. Məlumata görə, Hacıyevin Quliyevə pul borcu olub. Həmin gün onlar görüşərkən Tehran növbəti dəfə Cəfərdən pulunu tələb edib, sonra isə ona ağır xəsarətlər yetirib. Hacıyevin huşsuz halda yıxılıb, yerdə qaldığını görən Quliyev hadisə yerindən qaçıb.