Əli Əhmədov nazirləri tənqid etdi

Bu gün günün ikinci yarısında Milli Məclisdə “Azərbaycan Respublikasının 2013-cü il dövlət büdcəsi haqqında” qanun layihəsinin müzakirəsi davam edib.

“Veteninfo.az”ın Gün.Az-a istinadən xəbər verir ki, Yeni Azərbaycan Partiyasının icra katibi Əli Əhmədov büdcənin müzakirə olunduğu iclasda nazirlərin çoxunun iştirak etməməsinin parlamentə və büdcəyə hörmətsizlik olduğunu söyləyib:

“Bu sözlər onların qulaqlarına, beyinlərinə girsin. Ən azı burada səslənən təklifləri eşitmək onların vəzifə borclarıdır”.

 Əli Əhmədov bildirib ki, büdcə sadəcə, rəqəmlər deyil, arxasında müdrik siyasət durur:

“Burada tənqidlər səsləndirildi ki, niyə filan şeylər olmayıb. Bunlar arzulardır. Ancaq nə büdcəni nə arzularla formalaşdırmaq, nə də iqtisadiyyatı arzularla inkişaf etdirmək olar.

Bu gün iqtisadi böhranla üzləşən Amerika və Avropa ölkələri arzulamırlar ki, bu böhranı aradan qaldırsınlar?! Bacarmırlar, arzu var.

Ataların bir deyimi, ağıllı insanlar düşdükləri vəziyyətdən çıxış yolu tapır, müdriklər belə vəziyyətə düşmürlər. Azərbaycan 2008-ci ildə böhranla üzləşmədisə, bu, müdriklikdən xəbər verir. Bunun bir sübutu da bu gün müzakirə etdiyimiz büdcə layihəsidir”.