Elman Mustafazadə: “Xaricdə gənclər təşkilatlarının yaranmasını sürətləndirməliyik”

Biz diasporda milli birlik modelini yarada bilməsək, gördüyümüz işlər nəticəsiz ola bilər.

Bu sözləri "Veteninfo.az"a“ Azərbaycanın Dostları” Cəmiyyətinin sədri Elman Mustafazadə bildirib.

“Azərbaycan Prezidenti İlham Əliyev çıxışında düzgün olaraq qeyd etdi ki, səfirlik və diaspor təşkilatları işlərini vahid şəkildə qurmalıdırlar. Çünki erməni diasporu bu istiqamətdə fəaliyyət göstərir. Biz gənclər təşkilatlarının yaranmasında maraqlı olmalıyıq və bu işi sürətləndirməliyik.

Xaricdə savadlı və siyasi prosesləri düzgün təhlil edən, həqiqətlərimizlə bağlı erməni diasporuna əsaslandırılmış formada elmi cavab verməyi bacaran gənclərimiz kifayət qədərdir. Onların potensialını diaspor quruculuğu prosesinə cəlb etməliyik.

Xüsusilə, Azərbaycan həqiqətlərinin dünya ictimaiyyətinə çatdırılması istiqamətinə qəbul olunan sənədlər işlək vəziyyətə gətirilməli və bu gün “özümüz deyib, özümüz eşidirik” prinsipindən əl çəkməyin zamanıdır. O zaman işlərin sürətlə gedəcəyinin şahidi olacağıq” - deyə, Elman Mustafazadə qeyd etdi.