Masallı polisi təhqiqata başlayıb

Aprelin 3-də Müsavat Partiyasının Masallı rayon təşkilatına hücumla bağlı hüquq-mühafizə orqanları təhqiqata başlayıb. “vətəninfo.az”ın “musavat.com”a istinadən verdiyi xəbərə görə, bu haqda partiyanın rayon təşkilatının sədri Xasay Səfəroğlu məlumat verib. Dəfəroğlu bildirib ki, polis təşkilata basqın edən 3 nəfər - Eynulla Əzizov, Rasim Mirzəyev və Natiq İbrahimov haqqında ərizə və şikayətləri qəbul edib: “Rayon polisindən bizə bildiriş gəldi ki, şikayətiniz əsasında təhqiqata başlanılıb. Polisin təhqiqata başlamasına səbəb isə aprelin 5-də yazdığımız ilkin izahat və ərizələr olub”. Məlumatda deyilir ki, Masallı Rayon Polis Şöbəsidə faktı təsdiqləyib və bildiriblər ki, təhqiqatın nəticəsi barədə mətbuata əlavə məlumat veriləcək.