NATO gəmiləri Qara dənizi tərk etdi

Qara dənizdə təlimdə olan NATO gəmiləri akvatoriyanı tərk edib. Lent.az-ın Rusiya mətbuatına istinadən xəbərinə görə, alyansın hərbi gəmiləri Bosfor boğazını keçərək Aralıq dənizinə çıxıb. Martın 20-də NATO-nun hərbi-dəniz komandanlığı alyansın İkinci daimi dəniz qruplaşmasının (SNMG2) Rumıniya Hərbi Dəniz Qüvvələri ilə birgə keçirdiyi təlimləri başa vurduğunu və daimi patrul yerinə - Aralıq dənizinə qayıdacağını bildirmişdi. Xatırladaq ki, martın 3-4-də NATO-nun 5 hərbi gəmisi - Vicksburg raket kreyseri, Kanadanın Fredericton, Türkiyənin Turgutreis, İtaliyanın Aliseo və Almaniyanın Spessart gəmiləri Qara dəniz akvatoriyasına daxil olmuşdu. Bu gəmilər Bolqarıstanın Varna limanına da yan almışdılar. Daha sonra NATO gəmiləri Rumıniyanın Konstantsa limanına gəliblər. Burada onların təliminə Rumıniyanın Marasesti freqatı, iki raket daşıyan kater, 3 MİQ-21 hərbi təyyarəsi də qoşulub.