Miq.az xəbər verir ki, Bakı Ağır Cinayətlər Məhkəməsində Ağsu rayon sakini Vüqar Şirinovun (1983-cü il təv.) CM-nin 120.2.4 (xüsusi amansızlıqla qəsdən adam öldürmə) maddəsi ilə təqsirləndirilməsinə dair cinayət işi üzrə məhkəmə prosesi başa çatıb.

Bu il martın 5-də Nəsimi rayonunun 4-cü mikrorayonunda, Cavadxan küçəsində yerləşən "Odlar yurdu" çay evindən Ağsu rayon sakini Murad Qubadov (1975-ci il təv.) döş qəfəsi və sifət nahiyələrindən aldığı güllə yarası ilə Kliniki Tibbi Mərkəzə gətirilib və orada kəskin qanitirmədən ölüb. Səhərisi gün cinayəti törədən Vüqar Şirinov könüllü olaraq Ağsu RPŞ-yə gələrək təslim olub. Sonra o, aidiyyatı üzrə Nəsimi RPİ 19-cu polis bölməsinin əməkdaşlarına təhvil verilib. Qeyd edək ki, cinayətin aləti hesab edilən qundağı və lüləsi kəsilmiş "İJ-12” markalı ov tüfəngi əməliyyatçılar tərəfindən 20 yanvar küçəsindəki 40 saylı evin həyətində aşkar edilib. 

İş üzrə dindirilən V.Şirinov cinayəti pul borcu ilə əlaqədar törətdiyini bildirib.