Putin Qərb liderləri ilə danışıqlar aparıb

Rusiya prezidenti Vladimir Putin “Normand dördlüyü” formatında Fransua Olland (Fransa), Angela Merkel (Almaniya) və Pyotr Poroşenko (Ukrayna) ilə telefonla danışıqlar aparıb.

APA-nın Rusiyanın “1-ci kanalı”na istinadən verdiyi məlumata görə, Rusiya, Fransa, Almaniya və Ukrayna liderləri Ukraynanın Donbas regionundakı münaqişənin nizamlanmasına dair fikir mübadiləsi aparıblar.

Tərəflər Minskdə təmas qrupunun yeni görüşünün mümkün qədər tez baş tutmasının zəruriliyini qeyd ediblər. Həmçinin bildirilib ki, dekabrın 19-da Donetsk separatçıları ilə Kiyev nümayəndələrinin “Skype” konfransı faktiki nəticələr verməsə də, bu istiqamətdə işlərin sürətlənməsinə kömək edib.

Dövlət başçıları tərəflərin sərhəd xətlərinin müəyyənləşdirilməsi, ağır texnikanın geri çəkilməsi, əsirlərin mübadiləsi və zərərçəkmiş regionlarda əhaliyə humanitar yardımın göstərilməsi kimi məsələlərə dair fikir mübadiləsi aparıblar.