"İvanişvili Ermənistanla münasibətləri pozmaqda maraqlı deyil"

İvanişvili Ermənistanda ölçülü danışmaq məcburiyyətindədir.

Gürcüstan hökümətində hazırda siyasi koalisiya mövcuddur. Amma hələ də vahid komanda, vahid siyasət, məsələlərə yanaşmada müxtəlifliyi aradan qaldırmaq mümkün olmayıb.

Bu sözləri Veteninfo.az-a Azərbaycan Milli Strateji Təhqiqatlar Mərkəzinin sədri, politoloq Natiq Miri Gürcüstanın indiki hakimiyyətinin Dağlıq Qarabağ məsələsində tutduğu mövqeyini şərh edərkən bildirdi.

“Xarici işlər naziri xanım Pançikidzenin Litvadakı Qarabağla bağlı açıqlaması normaldır və Gürcüstanın maraqlarına uyğun gəlir. Çünki Gürcüstanın da Azərbaycan kimi ərazi bütövlüyü pozulub və təbii olaraq münaqişələrin ərazi bütövlüyü prinsipi ilə həll olunmasında maraqlıdırlar. Xanım nazirin də açıqlaması bu yöndədir. Ancaq hökumət başçısı İvanişvilinin Ermənistana səfəri zamanı verdiyi açıqlama da başa düşüləndir. Çünki İvanişvili qonşu Ermənistanla münasibətləri pozmaqda maraqlı deyil”,-deyən politoloq onu da əlavə etdi ki, bu, münasibətlərin normal olmasında həm Rusiya, həm də Qərb maraqlıdır: "O baxımdan İvanişvili Ermənistanda ölçülü danışmaq məcburiyyətindədir. Bu cür ölçülü açıqlamara rəğmən Gürcüstan yenə də beynəlxalq təşkilatlar səviyyəsində yenə də ərazi bütövlüyü prinsipindan yana səs verəcəyi şübhəsizdir”.

Elnur Eltürk