Yaponiya sahillərində sunami dalğaları qeydə alınıb

Yaponiyanın şimal-şərqində yerləşən İvate prefekturasının sahillərində 70 santimetr hündürlüyündə sunami dalğaları qeydə alınıb. Bu barədə Yaponiya Milli Meteorologiya İdarəsi məlumat yayıb.

Xəbər verdiyimiz kimi, sentyabrın 17-də Çilidə 8,4 bal gücündə zəlzələ baş verib. Çili Milli Fövqəladə Hallar Xidməti 4,5 metr hündürlüyündə sunami dalğalarının Kokimbo şəhərinə çatması barədə məlumat yayıb. İndiyədək beş nəfərin həlak olması barədə rəsmi məlumat var. Bir milyondan artıq insan isə təxliyyə olunub.

Yaponiya Meteorologiya İdarəsi həmin zəlzələdən sonra sunami xəbərdarlığı yayıb. Təqribən səhər saat 6:00 radələrində kiçik sunami dalğaları cənubda yerləşən Okinava prefekturasının sahillərinə çatıb. Tokionun şimalında yerləşən İvate prefekturasında bu dalğalar 30 santimetr, Hokkaydoda isə 10 santimetr hündürlüyündə olub.

Birinciyə nisbətən daha böyük olan ikinci dalğa təqribən 3 saat sonra İvate sahillərinə çatıb və onun hündürlüyü 70 santimetrə qalxıb. Meteoroloqların bildirdiyinə görə, növbəti dalğalar daha hündür ola bilər və buna görə də həyəcan siqnalı tam ləğv olunanadək dənizə yaxınlaşmaq təhlükəlidir.

AZƏRTAC