Bu sözləri Pravda.az-a açıqlamasında Milli Məclisin İctimai birliklər və dini qurumlar komitəsinin üzvü Ceyhun Məmmədov deyib.

 

Deputat bildirib ki, Azərbaycanda ziyalıların, fikir adamlarının sosial mediada daha fəal olmalarına, ideoloji iş aparmalarına ciddi ehtiyac var: "Burada bir neçə lazımi məqama fikir vermək lazımdır. Din insanın şəxsi seçimidir. Çalışmalıyıq ki, dindarlarla qeyri-dindarlar arasında uçurum yaranmasın. Bu uçurumun baş verməsi gələcəkdə çox ciddi problemlər yarada bilər. Cəmiyyətin haçalanması, parçalanması, bölünməsi ciddi bir formada gedə bilər. Bu bizi narahat etməlidir. Çalışmalıyıq ki, cəmiyyətimizi qoruyaq, belə hallar baş verməsin. Sovet hökuməti 70 il dinin qarşısını almağa çalışdı, amma nail olmadı. Azərbaycanda heç kim dinə meylin, dindarlaşmanın qarşısını ala bilməyəcək. Sadəcə, bunu düzgün istiqamətlərdə edə bilərik. Din xadimlərini bir yerə toplayaraq maarifləndirmə aparmaq yetərli deyil. Onsuz da din xadimləri bu məsələləri bilirlər. Kütlələrlə işləməliyik. Çalışmalıyıq ki, Azərbaycanda hazırda baş verən prosesləri düzgün tənzimləyək. Bu templə bir müddətdən sonra Azərbaycan cəmiyyətinin böyük bir hissəsi dindar olacaq. Təəssüf ki, bunların içində qeyri-ənənəvi dinlərin, təriqətlərin üzvlərinin sayı o qədər də az deyil. Ciddi fikirləşməliyik ki, nəyi düz etmirik. Nəyi etməliyik ki, cəmiyyətdə proseslər düzgün getsin. Bəzi ziyalılarımızın yazıları da cəmiyyətdə qarşıdurmaya,  fikir ayrılığının artmasına xidməti edir. Çıxış yolu geniş maarifləndirmə təbliğatı, ziyanların sosial mediada daha fəal iş qurmalarındadır”.