Rövnəq Abdullayev Türkiyəli nazirlə görüşüb

Azərbaycan Dövlət Neft Şirkətinin (ARDNŞ) prezidenti Rövnəq Abdullayev Türkiyənin elm, sənaye və texnologiyalar naziri Fikri İşıkın başçılıq etdiyi nümayəndə heyəti ilə görüşüb.

Vətəninfo.az ARDNŞ-ə istinadən xəbər verir ki, R. Abdullayev rəhbərlik etdiyi şirkətin hazırda Türkiyənin ən böyük xarici investoru olduğunu nəzərə çatdıraraq bildirib ki, TANAP layihəsi, “STAR” neft emalı zavodunun inşası və “Petkim“ neft-kimya holdinqinin yenidənqurma layihələri Türkiyənin beynəlxalq enerji sənayesində önəminin daha da artmasında mühüm rol oynayacaq.

Öz növbəsində türkiyəli nazir ARDNŞ-in operatorluğu ilə həyata keçirilən TANAP layihəsinin regional inkişafa mühüm təsir göstərəcəyini vurğulayıb.

“SOCAR-Türkiyə Enerji” şirkətinin rəhbəri Kənan Yavuz ARDNŞ-in qardaş ölkədə həyata keçirdiyi layihələr barədə ətraflı məlumat verib.

Görüşdə tərəfləri maraqlandıran digər məsələlər ətrafında da geniş fikir mübadiləsi aparılıb.