Bakı Apellyasiya Məhkəməsində Azərbaycan Respublikası vətəndaşları Rufan Ağcabəyov və Vladimir Marfinin CM-nin 12.1, 279.1-ci (qanunvericiliklə nəzərdə tutulmayan silahlı birləşmələri və ya qruplar yaratma, eləcə də onların yaradılmasında və fəaliyyətində iştirak etmə) və 283-1.3-cü (milli, irqi, sosial və ya dini düşmənçiliyin salınması) maddələri ilə təqsirləndirilmələrinə dair məhkəmə prosesi başa çatıb.

 

Miq.az-ın məlumatına görə, Rufan Ağcabəyov və Vladimir Marfin ləğv edilmiş MTN tərəfindən keçirilmiş antiterror tədbirləri nəticəsində həbs ediliblər. İstintaq materiallarına əsasən, təqsirləndirilən şəxslər 2013-2015-ci illər ərzində Suriya və İraq ərazisində həmin dövlətlərin, habelə Azərbaycan Respublikasının qanunvericiliyi ilə nəzərdə tutulmayan ayrı-ayrı silahlı birləşmələrin, o cümlədən "İslam Dövləti (İŞİD)”, "Cəbhətül-Nusra” və "Cundu Şam” terrorçu təşkilatlarının fəaliyyətində iştirak ediblər. 

 

Bakı Ağır Cinayətlər Məhkəməsinin hökmü ilə Vladimir Marfin 14 il 6 ay, Rufan Ağcabəyov 13 il müddətinə azadlıqdan məhrumetmə cəzalarına məhkum olunublar. 

Hökmdən narazı qalan məhkumlar apellyasiya şikayətləri veriblər.

Bakı Apellyasiya Məhkəməsi onların şikayətlərini təmin etməyərək, birinci instansiya məhkəməsinin hökmünü qüvvəsində saxlayıb.