Dağlıq Qarabağ gündəmdə - AŞPA-da yeni məruzə qəbul olundu

Bu gün AŞPA siyasi komitəsinin Parisdə keçirilən iclasında britaniyalı məruzəçi Robert Valterin hazırladığı "İşğal olunmuş Dağlıq Qarabağ və ətraf ərazilərdə gərginliyin artması” adlı məruzə səsə qoyularaq qəbul olunub. 

 

Vizual.az məlumat verir ki, müzakirələr zamanı Ermənistan nümayəndə heyəti məruzəçiyə qarşı ittihamlar irəli sürüb və məruzənin qəbul olunmaması üçün cəhdlər göstərib. Yaranan vəziyyəti nəzərə alan komitə sədri məruzənin AŞPA-nın yanvar sessiyasına tövsiyə olunmasını səsverməyə qoyub və erməni deputatların ciddi səylərinə baxmayaraq, məruzə siyasi komitənin, demək olar, bütün üzvləri tərəfindən dəstəklənib və qəbul olunub. 

Azərbaycan nümayəndə heyətinin rəhbəri Səməd Seyidov tərəfindən irəli sürülən təkliflər siyasi komitənin əksər üzvləri tərəfindən dəstəklənərək məruzəyə daxil edilib. Bu təkliflərə Ermənistan nümayəndə heyətinin konstruktivlikdən uzaq davranışı və apardığı siyasətin pislənilməsi və bu siyasətə son qoyulması, Azərbaycanın işğal olunmuş ərazilərindəki vəziyyətlə bağlı məsələlərin Ermənistanın birbaşa məsuliyyəti və onun törətdiyi işğalın nəticəsi olması, azərbaycanlıların Dağlıq Qarabağda qeyri–qanuni hökm əsasında girov saxlanılması və onların dərhal azadlığa buraxılması daxildir.