GAİP və ATXƏM İran səfirliyi önündə aksiya keçirdi

İranın Azərbaycandakı səfirliyinin binası qarşısında Güney Azərbaycan İstiqlal Partiyasının (GAİP), Azərbaycanlıların və digər Türkdilli Xalqların Əməkdaşlıq Mərkəzi (ATXƏM)  aksia keçirdi. “Vətəninfo.az”ın məlumatına görə, aksiya iştirakçıları M.F. Axundov bağından səfirliyin binasına tərəf İranın Azərbaycana qarşı fəaliyyətinin əleyhinə şüarlar səsləndirməklə yürüş ediblər. Binanın qarşısına toplaşan aksiya iştirakçıları “Azərbaycan bir olsun, paytaxtı Təbriz olsun!”, “Azərbaycan bir olsun, istəməyən kor olsun!”, “Haray, haray mən türkəm!”, “Rus, fars, erməni, bunlar türkün düşməni”, “Rədd ol!”, “Urmu gölü can verir, İran rejimi qətlinə fərman verir”, “Od vurarıq Tehrana and olsun Səttarxana” və s. şüarları səsləndiriblər. 

Tədbirdə GAİP İsveç şöbəsinin rəhbəri Səməd Fərtaş, DAK İH üzvləri,güneyli mühacir Cavad Derəxti, Səftər Rəhimli və digərləri çıxış edərək İranın Azərbaycana qarşı apardığı kampaniyanı pisləyiblər. Sonra səfirliyin qarşısına qara çələng qoyulub. Aksiyanın qətnaməsi oxunduqdan sonra səfirliyə verilməsi üçün polis əməkdaşlarına təqdim edilib. ATXƏM-dən verilən məlumata görə, aksiyaya Dünya Azərbaycanlıları Konqresi və Milli demokrat Bozqurd Partiyasının təmsilçiləridə dəstək verib.