1. Miq.az
  2. "Bəzi “qazdan ayıq” xəbər saytları..." - DİN-dən "böyrək satıram" elanına reaksiya

"Bəzi “qazdan ayıq” xəbər saytları..." - DİN-dən "böyrək satıram" elanına reaksiya

Tarix: 02.10.2015 11:14
Baxış sayı: 517

Dünən Bakıda böyrək satılması ilə bağlı xəbərə Daxili İşlər Nazirliyindən (DİN) reaksiya verilib.

Qeyd edək ki, bəzi xəbər portallarında və sosial şəbəkələrdə Bakı küçələrində "böyrək satıram" elanları vurulduğu bildirilib.

Məsələ ilə bağlı DİN Mətbuat Xidmətinin rəis müavini Ehsan Zahidov açıqlama verib. DİN rəsmisi həmin xəbər və ona əlavə edilən elanın fotosunun yeni deyil, ötən ilə aid olmasını deyib:

"Diqqətli vətəndaşlarımızın yəqin ki, hələ də xatirindədir, keçən ilin iyun ayında Bakı metrosunun "Qara Qarayev” stansiyasının çıxışında naməlum şəxslərin insan böyrəkləri satması ilə əlaqədar  elanların asılması barədə kütləvi informasiya vasitələrində, eləcə də sosial şəbəkələrdə məlumatlar yayılmışdı. Elə o vaxt Daxili İşlər Nazirliyinin  İnsan Alverinə Qarşı Mübarizə Baş İdarəsi əməkdaşlarının dərhal həyata keçirdikləri tədbirlər nəticəsində başqasına məxsus mobil telefon nömrələrini göstərməklə həmin elanları yazıb qeyd olunan ərazidə yaymış iki nəfər- Bakı şəhər sakinləri, 19 yaşlı Emil Emkiyev və 17 yaşlı Muxtar İsmayılov müəyyən edilərək saxlanılmışdılar. Araşdırma zamanı gənclər heç də böyrəklərini satmaq fikrində olmadıqlarını, belə elan verməkdə məqsədlərinin vətəndaşlarla guya zarafat etmək və cəmiyyətin buna reaksiyasını öyrənmək olduğunu bildirmişdilər. Onlar əməllərindən səmimi peşmançılıq keçirərək etdikləri hərəkətlərə görə üzr istəmiş və bir daha belə "zarafat”lar etməyəcəklərinə söz vermişdilər. E.Emkiyevə və M.İsmayılova ciddi xəbərdarlıq edildikdən sonra sərbəst buraxılmışdılar. O vaxt İnsan Alverinə Qarşı Mübarizə Baş İdarəsi bu məlumatı yayaraq məsələyə aydınlıq gətirmişdir. Lakin bu məlumatın üstündən bir ildən də çox vaxt keçəndən sonra, yəni dünən, bəzi xəbər portallarında və sosial şəbəkələrdə eyni məzmunlu məlumat yayıldı ki, yenə kimsə böyrəyini satır.
 Bu dəfə də DİN rəhbərliyinin göstərişi əsasında dərhal araşdırmalara başlanıldı və məlum oldu ki, elanlar da, orada göstərilən mobil telefon nömrələri də, elanların asıldığı yer də ötənilkidir. Sadəcə kimlərsə o vaxt saytlarda getmiş həmin xəbəri eşələyib çıxarıb və yenidən yayıb. Çox təəssüflər olsun ki, bəzi "qazdan ayıq” xəbər saytları da bu məlumatın köhnəliyini tuta bilməyib, dəqiqləşdirmə aparmadan, mahiyyətinə varmadan dərhal "şok xəbər” kimi yayıblar”.


Həmçinin oxuyun

İSTİFADƏ QAYDALARI

Müəllif hüquqları qorunur.
Məlumatdan istifadə etdikdə istinad mütləqdir.
Məlumat internet səhifələrində istifadə edildikdə müvafiq keçidin qoyulması mütləqdir.
BİZİMLƏ ƏLAQƏ

Tel: +994 55 875 56 58
[email protected]

www.miq.az