BMT Bela məbədinin partladıldığını təsdiqləyib

BMT Suriyanın Palmira şəhərində yerləşən Bela adlı tanrıya həsr olunmuş məbədin özünü "İraq və Şam İslam Dövləti” adlandıran terrorçu qruplaşmanın üzvləri tərəfindən dağıldığını peykdən çəkilmiş şəkillərin təhlili əsasında təsdiqləyib. BMT-nin "Twitter” servisindəki rəsmi bloqunda sentyabrın 1-nə keçən gecə verilən məlumatda deyilir ki, məbədin əsas binası və onun yaxınlığındakı sıra sütunlar dağıdılıb.

Almaniyanın "dpa” agentliyinin istinad etdiyi suriyalı fəallar bildirirlər ki, cihadçılar təxminən 2 min il əvvəl ucaldılan binanı partladıblar. Onlar qalan məbədləri və Palmiranın unikal tarixi obyektlərini də dağıtmaqla hədələyirlər. Suriyanın müxalif "Masar Press” resursu silahlılardan birinin "Sonuncu bina dağıdılana qədər məhv etməyə davam edəcəyik” sözlərini sitat gətirib.

Yeni eranın 32-ci ilində tikilən Bela məbədi Palmira muzey kompleksinin ən qədim və əhəmiyyətli abidələrindən biri sayılırdı. O, UNESCO-nun Dünya Mədəni İrs Siyahısına daxil idi.