"Qafqazinfo” xəbər verir ki, Kənan Seyidov 1974-cü ilin bu günü İmişli rayonunun Bəhrəmtəpə qəsəbəsində anadan olub. 

General Seyidov uzun illər Xüsusi Təyinatlı Qüvvələrdə xidmət edib. 2003-cü ildə Ümummili Lider Heydər Əliyev tərəfindən "Azərbaycan Bayrağı” ordeni, Prezident İlham Əliyevin sərəncamları ilə isə "Vətən uğrunda” və "İgidliyə görə” medalları ilə təltif olunub.

O, Birinci Qarabağ, 2016-cı ilin Aprel döyüşlərində və Vətən Müharibəsində xüsusilə fərqlənib. Şuşa şəhərinin azad olunmasında iştirak edən qoşunlara rəhbərlik edib.

Vətən müharibəsi zamanı Xüsusi Təyinatlı Qüvvələr Komandanının birinci müavini - Qərargah rəisi kimi Cəbrayıl, Füzuli və Şuşanın azad edilməsi uğrunda gedən hərbi əməliyyatlar zamanı xüsusi peşəkarlıq, mətinlik və şücaət nümayiş etdirdiyi üçün Silahlı Qüvvələrin Ali Baş Komandanı, Prezident İlham Əliyevin müvafiq sərəncamları ilə general-mayor ali hərbi rütbəsinə və "Vətən Müharibəsi Qəhrəmanı” adına layiq görülüb.

2022-ci ilin avqust ayında Laçın şəhərinin Zabux və Sus kəndlərinin nəzarətə götürülməsi barədə məruzəni də Prezident İlham Əliyevə general-mayor K.Seyidov edib.