Bakıda bu gün əsən güclü külək nəticəsində 25-dək ağac aşıb.

Vətəninfo.az xəbər verir ki, bunu Trend-ə Bakı Şəhər İcra Hakimiyyəti Yaşıllaşdırma Təsərrüfatı Birliyinin Bitkiləri Mühafizəsi Stansiyasının rəisi Əli Ağayev bildirib.

Onun sözlərinə görə, ağaclar daha çox Bakının Nizami rayonunda aşıb. Bu, həmin rayonda qovaq ağaclarının daha çox əkilməsi ilə bağlıdır: "Bu gün bizə daxil olan müraciətlər də qovaq ağaclarının aşması ilə bağlıdır. Artıq aşmış ağacların çox hissəsi ərazidən götürülüb. Amma bununla əlaqədar hələ də zənglər edilir”.

Ə.Ağayev qeyd edib ki, güclü küləyin əsməsi ağaclar üçün təhlükə törətdiyindən bu gün gücləndirilmiş iş rejimində çalışırlar. Hazırda 10 briqada hadisə yerlərində işləyir: "Sabah da gücləndirilmiş iş rejimində çalışacaqlar. Qırılmış ağacları ərazidən təmizləyənə qədər bu işləri davam etdirəcəyik”.

Qeyd edək ki, bu gün Bakıda güclü şimal-qərb küləyi əsir.