Niderlandın Bakıdakı səfirliyində bayraqlar yarıya endirildi

Niderland Krallığının Azərbaycandakı səfirliyinin önündəki bayraqlar yarıya endirilib.

Vətəninfo.az xəbər verir ki, bu barədə "Report"a səfirlikdən məlumat verilib.

Diplomatik nümayəndəlikdən bildirilib ki, 1 il əvvəl Ukraynanın Donetsk şəhəri yaxınlarında vurulan "Malayziya Hava Yolları"na aid təyyarədə həlak olanların xatirəsini yad etmək üçün krallığın dövlət bayrağı yarıya endirilib.

Xatırladaq ki, 1 il əvvəl MH17 Amsterdam - Kuala-Lumpur reysini yerinə yetirən "Malayziya Hava "Yolları" aviaşirkətinə məxsus Boinq-777 sərnişin təyyarəsi Donetsk üzərində vurulub.

Təyyarə qəzası nəticəsində 283 sərnişin və 15 ekipaj üzvü həlak olub, onlardan 192 nəfəri Niderland vətəndaşı, 44 nəfəri isə Malayziya vətəndaşı olub.

Bu yaxınlarda Malayziya hadisənin səbəblərini araşdırmaq üçün BMT-də beynəlxalq tribunalının yaradılması təşəbbüsü ilə müraciət edib.