Təhsil və karyera sərgisinə çox böyük maraq olduğunu görürük

"Bakı Ekspo Mərkəzi”ndə keçirilən IX Azərbaycan Beynəlxalq təhsil və karyera sərgisində Türkiyənin digər ali təhsil müəssisələri ilə bərabər bizim universitetimiz də iştirak edir. Bu sərgiyə çox böyük maraq olduğunu görürük.

Vətəninfo.az xəbər verir ki, bu sözləri AZƏRTAC-a Türkiyənin İstanbul Aydın Universitetinin təmsilçisi Səbinə Hüseynova bildirib. S.Hüseynova qeyd edib ki, sərgidə iştirak etməkdə məqsədimiz universitetimizdə təhsil almaq imkanları, təhsil proqramları və s. barədə gənclərə ətraflı məlumat verməkdir. Türkiyənin ali məktəblərində xeyli azərbaycanlı tələbə oxuyur. 37 minədək tələbəsi olan İstanbul Aydın Universitetində 4 min xarici vətəndaş təhsil alır, onların arasında azərbaycanlı tələbələr çoxluq təşkil edir.

S.Hüseynova IX Beynəlxalq təhsil və karyera sərgisinin çox yaxşı təşkil olunduğunu da vurğulayıb.

Xatırladaq ki, təhsil və karyera sərgisi oktyabrın 11-də başa çatacaq.