Ermənistanda vəziyyət yenə gərginləşdi

Tarix: 29.07.2015 12:30
Baxış sayı: 190

İşğalçı ölkədə etirazların səngiməməsinin sirri

İşğalçı Ermənistanda bir aydan artıqdır başlayan etiraz aksiyaları yenidən genişlənir. Elektrik enerjisi tariflərinin artırılmasına qarşı çıxan "Qalx, Ermənistan” hərəkatı İrəvanın mərkəzindəki Respublika meydanında 72 saatlıq oturaq piket keçirməyə qərar verib. Hərəkatın bununla bağlı yaydığı bəyanatda bildirilir: "Serj Sərkisyanın 27 iyun tarixli çıxışından bir ay keçməsinə baxmayaraq, elektrik enerjisi tariflərinin artırılması məsələsi hələ də nizamlanmamış qalmaqdadır”.

Bu səbəbdən "Qalx, Ermənistan” Vətəndaş Təşəbbüsü Şurası bu gün axşam saatlarından etibarən 72 saatlıq oturaq piket keçirməyə qərar verərək Baqramyan prospektindəki aksiyalar zamanı səsləndirilən bütün tələbləri yenidən irəli sürür.

İrəvan polisi isə elektrik enerjisi tariflərinin artırılmasına qarşı çıxan "Qalx, Ermənistan” hərəkatının Respublika meydanında 72 saatlıq oturaq piket keçirməsinə mane olmağa çalışıb.

APA-nın "TASS”a istinadən verdiyi xəbərə görə, polis əməkdaşları canlı sədd yaradaraq etirazçılara meydana doğru irəliləməyə imkan verməyiblər. İrəvan polis rəisinin müavini Valeri Osipyanın sözlərinə görə, aksiya təşkilatçıları "özlərinə diqqəti cəlb etmək üçün asayiş keşikçiləri ilə qarşıdurma yaratmağa cəhd edirlər”

"Qalx, Ermənistan” vətəndaş hərəkatı isə bəyanat yayaraq bildirib ki, Ermənistan polisi uzun müddət Respublika meydanını bağlı saxlaya bilməyəcək. Ona görə də polis vətəndaşların qanuni tələbləri qarşısında geri çəkilməyə məcbur olacaq. Bəyanatda qeyd olunur ki, vətəndaş cəmiyyəti xalqın əleyhinə olan rejimə qarşı dinc mübarizədə polisin qeyri-qanuni əməllərinə tabe ola bilməz. Bu üzdən hərəkat üzvləri meydanın mərkəzində oturaq aksiya keçirməkdə israrlıdır.

Qeyd edək ki, işğalçı Ermənistanda bir aydan artıqdır etiraz aksiyaları başlayıb və səngimir. İki gündür daha da şiddətlənib. İşğalçı ölkədə bu prosesin nədən səngimədiyi, eyni zamanda hakimiyyətin insanları meydanlardan çəkilmək üçün daha kəskin addımlara getməməsinin nə ilə bağlı olduğu maraq doğurmaya bilməz.

Politoloq Ərəstun Oruclu hesab edir ki, Ermənistanda etiraz hərəkatının hələ də davam etməsində bir sıra amillərin rolu var. İlk növbədə Ermənistan cəmiyyətində hələ ki ən azı müəyyən hüquq və azadlıqların təmin olunması qalıb. O cümlədən sərbəst toplaşmaq azadlığının rahat şəkildə həyata keçirildiyini görmək mümkündür. Birinci səbəb budur. İkinci səbəb budur ki, Ermənistan hakimiyyəti yüksək ehtimalla bu prosesin özündə maraqlıdır: "Görünür, Ermənistan hakimiyyətinin hansısa siyasi planlarına uyğun şəkildədir və ona görə də hakimiyyət radikal addımlara getmir. Üçüncüsü, mən istisna eləmirəm ki, burda xarici faktorların da rolu var. İlk növbədə erməni diasporunun rolu ola bilər. Hələlik dəqiq bilinmir ki, bu mitinqlərin arxasında kim dayanır. İstisna deyil ki, bu elə Rusiyadakı müəyyən dairələr olsun.

Çünki Rusiyanın daxilində də müxtəlif var və bu maraqların toqquşmasının şahidi oluruq. Mən ilk növbədə Kreml oliqarxiyasının hərbi-sənaye kompleksini nəzərdə tuturam. Arada ziddiyyətlər var və şübhəsiz ki, bu özünü bir çox məsələlərdə göstərir. Məsələn, bugünlərdə gördük ki, Ermənistana Rusiyanın Hərbi Kəşfiyyat Qurumunun Baş Kəşfiyyat İdarəsinin direktoru gəldi. Belə səfərlər heç nədən baş vermir.

Düzdür, bunu bir çoxları Azərbaycan-Ermənistan cəbhə xəttində gərginliyin artması ilə izah elədilər. Ancaq mən düşünürəm ki, sırf Ermənistandakı daxili siyasi səbəblərlə bağlıdır. Digər tərəfdən, biz unutmayaq ki, Ermənistanda müəyyən Qərb faktoru da var. Bu faktor Azərbaycandakından daha güclüdür.

Ən azı ona görə ki, Ermənistanın aparıcı Qərb ölkələrində güclü diaspora qurumları mövcuddur. Onlar Ermənistanın Qərbə inteqrasiya olunmasında maraqlıdır. Bir sözlə, bütün bunları nəzərə alanda deyərdim ki, Ermənistanda proseslərin səngiməməsində kompleks səbəblər var”.